NAGA World ត្រូវដោះជាបន្ទាន់នូវសំណង់ខុសច្បាប់ ដែលធ្វើឲ្យខូចសោភ័ណភាពទីក្រុង
06-November-2015 | ដោយ ពល រាជសី
ភ្នំពេញ៖ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងកាលពីរសៀលថ្ងៃទី៥ ខែវិច្ឆិកា ថា មានការបើកកិច្ចប្រជុំបន្ទាន់មួយ ពាក់ព័ន្ធនឹងសំណង់របស់ក្រុមហ៊ុន NAGA World ដែលបានសាងសង់ខុសច្បាប់ អនុញ្ញាតរបស់ក្រសួងរៀបចំដែនដី នគរូបនីយកម្ម និងសំណង់ ដែលត្រូវបានរៀបចំឡើង ក្រោមអធិបតីភាពលោក អឹម ឈុនលឹម ទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោកអភិបាលរាជធានីភ្នំពេញ ឯកឧត្តម ប៉ា សុជាតិវង្ស។
លោកបានបញ្ជាក់ឲ្យដឹងថា កិច្ចប្រជុំនោះបានសម្រេចនូវបញ្ហាមួយចំនួនដូចជា ១-ក្រសួងរៀបចំដែនដីនឹងចេញលិខិតផ្អាកសំណង់ និងឲ្យរុះរើ។ ២-ក្រុមជាងក្រុមហ៊ុន ចាប់ផ្តើមរុះរើដោយខ្លួនឯងចាប់ពីថ្ងៃសុក្រនេះ គឺរុះដំបូលមុខ ពុទ្ធសាសនបណ្ឌិតជាមុន ។ ៣-ចាត់មន្ត្រីជំនាញ ប្រចាំការជំរុញដំណើរការនេះរហូតដល់ទីបញ្ចប់។
ចំណាត់ការចំពោះសំណង់ក្រុមហ៊ុន NAGA Worldនេះ បានធ្វើឡើងភ្លាមៗក្រោយពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានណែនាំឲ្យអាជ្ញាធរ មានសមត្ថកិច្ច និងជំនាញពាក់ព័ន្ធទាំងអស់ ឱ្យពិភាក្សា និងមានវិធានការកែលម្អវិញជាបន្ទាន់ នូវសំណង់អគាររបស់ក្រុមហ៊ុន NAGA World ដែលបានសាងសង់ប៉ះពាល់ ដល់សោភ័ណភាពរាជធានី ដើម្បីធ្វើយ៉ាងណាឲ្យរក្សាបាននូវលំហសាធារណៈ សម្រាប់ប្រជាពលរដ្ឋមកលម្ហែកំសាន្តនៅសួន សម្តេចហ៊ុន សែន ឱ្យដូចដើម បន្ទាប់ពីសម្តេចបញ្ចប់ពិធីសម្ពោធគម្រោងការពារទឹកជំនន់ជំហាន៣ របស់ JICA កាលពីព្រឹកថ្ងៃទី៥ ខែវិច្ឆិកា កន្លងមកនេះ៕
ចំនួនអ្នកទស្សនា
- ថ្ងៃនេះ6281
- ម្សិលមិញ4461
- សប្តាហ៍នេះ10751
- ខែនេះ32631
- ឆ្នាំនេះ32631
- សរុប20475087